ᐱᓕᕆᐊᒃᓴᐃᑦ ᓴᓇᔭᒃᓴᐃᓪᓗ

ᓴᓇᐅᒐᐃᑦ ᐃᓅᓯᕐᒧᑦ

ᐳᖅᑐᓂᓕᖕᓂ: ᐳᖅᑐᓂᓕᖕᒥ 6-ᒥ ᐃᓄᓕᕆᓂᖅᒥᒃ ᐃᓕᓐᓂᐊᕐᓂᖅ

ᐸᕐᓇᒃᓯᒪᓂᖅ: ᐊᒥᓱᓕᐅᕐᓗᒋᑦ ᐊᔾᔨᒋᑦ ᐱᔭᕆᐊᖃᕈᕕᒋᑦ. ᐊᒥᓱᓕᐊᕆᓗᒋᑦ ᐱᓕᕆᕕᒃᓴᖅ 1 - ᐱᓕᕆᐊᒃᓴᐃᑦ ᐅᓪᓗᒥ ᐊᒻᒪᓗ ᑲᑎᖓᐅᕐᓗᑎᒃ ᐱᓕᕆᐊᒃᓴᐃᑦ 1 - 6 - ᑲᒥᕗᑦ

ᐊᑯᓂᐅᓂᖏᑦ: ᐅᖃᐅᓯᐅᓂᖏᑦ ᐱᕙᓪᓕᐊᓂᖏᓐᓂᒃ - 30 ᒥᓂᑦ; ᐅᖃᓕᒫᕐᓗᑎᒃ ᐅᓂᒃᑳᕐᓗᑎᒡᓗ ᑲᒥᓕᐅᕐᓂᕐᒥᒃ ᐊᑐᖅᑕᐅᔭᕆᐊᖃᖅᑐᓂᒃ - 90 ᒥᓂᑦ; ᐃᓱᒪᒋᓕᖅᑕᖏᓐᓂᒃ ᑎᑎᕋᐅᑎᖃᕐᓂᖅ - 60 ᒥᓂᑦ = 180 ᒥᓃᑦ.

ᐱᖂᑎᑦ: ᐱᑕᖃᖏᑦᑐᑦ

ᑐᕋᖅᑕᐃᑦ:

  • ᐅᓂᒃᑳᕐᓗᑎᒃ ᖃᓄᖅ ᐊᕙᑎᖏᓐᓄᑦ ᐃᓄᐃᑦ ᓱᖏᐅᑎᓯᒪᖕᒪᖔᑕ ᐃᓕᖅᑯᓯᖏᓐᓂ
  • ᐊᑐᕐᓗᑎᒃ ᐊᔾᔨᒋᖏᑦᑑᑎᓂᒃ ᑐᑭᓯᓂᐊᕐᕕᖕᓂ ᓴᓇᕐᕈᑎᓂᒡᓗ ᖃᐅᔨᓴᕐᓂᖏᓐᓄ ᐃᓄᖕᓂᒃ
  • ᑎᑎᕋᕈᑎᒋᓗᒋᑦ ᐃᓱᒪᒋᔭᖏᑦ

ᓄᑖᑦ ᐅᖃᐅᓰᑦ ᐃᓕᓐᓂᐊᖅᑕᖏᑦ:
ᐅᖅᓱᖅ, ᐊᒡᓗ, ᐅᓈᖅ, ᐃᓄᐃᑦ, ᑲᒥᒃ, ᒪᒦᔭᐃᑦ/ᓯᕐᓕᕆᔭᐅᑦ, ᐊᓪᓕᕋᖅ, ᐃᕙᓗ, ᐊᓚ/ᐊᑐᖓ, ᐃᓐᓂᕐᕕᒃ, ᓴᓇᐅᒐᖅ
(ᑕᑯᓗᒋᑦ ᐅᖃᐅᓰᑦ ᑐᑭᖏᓐᓄᑦ)

ᖃᓄᐃᓕᐅᕈᑏᑦ ᐅᓂᒃᑳᖅᑕᐅᓂᖏᑦ:

ᐱᒋᐊᕐᓗᑎᒃ:
ᓴᓇᓯᒪᓗᑎᒃ ᑕᑯᔭᒃᓴᒥᒃ ᓄᓇᖑᐊᕐᒥᒃ ᑲᓇᑕ, ᓇᓂᓂᐊᕐᓗᒋᑦ ᑲᓇᑕᒥ ᐅᑭᐅᖅᑕᖅᑐᖅ, ᐊᒻᒪᓗ ᓄᓇᑐᖃᖏᑦ ᐊᒥᓱᑦ ᐃᓄᐃᑦ ᑕᐅᕙᓂ ᐃᓅᔪᑦ. ᑎᑎᕋᕐᓗᑎᒃ ᐊᖕᒪᓗᖅᑐᓂᒃ ᐊᒥᓱᓂᒃ ᐅᕙᓗᓐᓃᑦ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᑎᑎᕋᕐᕕᒡᔪᐊᕐᒥ, ᐃᓕᐅᖃᕐᓗᒋᓪᓗ ᓯᓚ, ᓄᓇ, ᐱᕈᖅᑐᑦ, ᐆᒪᔪᐃᑦ ᐊᒻᒪᓗ ᐃᓄᐃᑦ. ᐊᐱᕆᓗᒋᑦ ᐃᓕᓐᓂᐊᖅᑐᑦ ᑕᐃᔪᓐᓇᕐᒪᖔᑕ ᖃᐅᔨᒪᓕᐊᓂᒃᑕᖏᓐᓂᒃ ᐅᑭᐅᖅᑕᖅᑐᒥᒃ ᐱᔾᔪᑎᖃᖅᑐᓂᒃ. ᑎᑎᕋᕐᓗᒋᑦ ᐊᖕᒪᓗᖅᑐᓕᐊᕆᔭᐅᖃᐅᔪᓂ ᐃᓱᒪᒋᔭᐅᔪᓂ ᐃᓗᐊᓂ, ᐃᓚᕙᓪᓕᕋᐅᔭᕐᓗᒋᑦ ᓄᑖᑦ ᐃᓱᒪᒋᔭᐅᕙᓪᓕᐊᔪᑦ. ᕿᒥᕐᕈᐊᕐᓗᒋᑦ ᐃᓱᒪᓕᐊᕆᔭᐅᔪᑦ, ᐅᓂᒃᑳᕐᓗᒋᓪᓗ ᖃᓄᖅ ᐊᖑᓇᓱᒃᐸᓚᐅᕐᒪᖔᑕ ᐃᓄᐃᑦ ᐃᓅᓇᓱᐊᖅᓱᑎᒃ ᐃᒃᑭᕐᓇᖅᑐᕐᔪᐊᕐᒥ ᐊᕙᑎᓕᖕᒥ.

ᕿᓰᑦ ᐊᑐᖅᑕᐅᕙᓚᐅᖅᑐᑦ ᐊᓐᓄᕌᒃᓴᓄᑦ, ᐃᒻᒪᒍᓐᓇᖏᑦᑐᓄᓪᓗ ᑲᒥᖕᓄᑦ. ᓇᑦᑏᑦ ᐱᑖᕈᑕᐅᕙᓚᐅᖅᑐᑦ ᓂᕿᒃᓴᒥᒃ, ᐅᖅᓱᒃᓴᒥᒃ ᖁᓪᓕᕐᒧᑦ, ᑐᐱᒃᓴᓂᒃ, ᐅᒥᐊᒃᓴᓂᒃ, ᐊᒃᖢᓈᒃᓴᓂᒃ, ᐳᑦᑐᖁᑎᓂᒃ ᓴᓇᕐᕈᑎᓂᒡᓗ (ᓴᐅᓂᖏᓐᓂᒃ). ᑐᒃᑐᐃᑦ ᐊᒥᖏᑦ ᒥᖁᓖᑦ ᐅᖂᓇᕐᓂᖅᐹᖑᓚᐅᖅᐳᑦ. ᑐᒃᑐᐃᑦ ᐊᑑᑎᖃᓚᐅᕐᒥᔪᑦ ᓂᕿᒃᓴᓄᑦ, ᐃᕙᓗᓄᑦ, ᕿᐱᒃᓴᓄᑦ, ᓴᓇᕐᕈᑎᒃᓴᓄᑦ (ᓴᐅᓂᖏᓐᓂᒃ) ᐊᒻᒪᓗ ᐱᐅᓴᐅᑎᖑᐊᓂᒃ (ᑭᒍᑎᖏᑦ). ᐱᐅᔪᒻᒪᕇᖕᓂ ᒥᖅᓱᕈᓐᓇᖅᑐᑦ ᐱᐅᒋᔭᐅᔪᒻᒪᕆᐅᓚᐅᖅᐳᑦ

ᐃᓄᖕᓂ ᐃᓅᖃᑎᒌᒃᑐᓂ - ᓱᖃᐃᒻᒪᓗᓐᓃᑦ ᐊᕐᓇᖅ ᒥᖅᓱᕈᓐᓇᑦᑎᐊᖅᑐᖅ ᓄᓕᐊᖅᑖᕆᔭᐅᔪᒪᔪᒻᒪᕆᐅᓯᒪᕗᖅ. ᐃᓚᖏᑦ ᐃᓅᔪᓐᓇᕋᔭᕐᒪᑕ ᒥᖅᓱᕈᓇᑦᑎᐊᕐᓂᖓᓄᑦ.

ᑎᑎᕋᕐᓗᒋᑦ ᑕᕐᕆᔭᕐᓗᒋᓗᓐᓃᑦ ᓴᓇᐅᒐᐃᑦ ᒪᐃᓇ ᓇᐹᖅᑑᑉ (ᑕᑯᒃᓴᐅᖕᒥᔪᑦᓯᕗᓪᓕᖅᐹᓂ ᐅᖃᐅᓯᕐᓂ ᖃᕆᑕᐅᔭᒃᑯᑦ ᑕᑯᔭᒐᖃᕐᕕᖕᓂ ᑲᒥᕗᑦ: ᐃᓄᐃᑦ ᐊᕐᓇᐃᑦ ᓴᓇᐅᒐᖏᓐᓂ) .

ᒪᐃᓇ ᓇᐹᖅᑐᖅ ᐃᓅᓚᐅᖅᓯᒪᔪᖅ ᑰᔾᔪᐊᕌᐱᖕᒥ 1913-ᖑᑎᓪᓗᒍ. ᐃᓕᖅᑯᓯᑐᖃᕐᒥᓂᒃ ᐃᓕᓐᓂᐊᖅᓯᒪᔪᖅ, ᐊᔪᖏᑦᑐᒻᒪᕆᒃ ᕿᓯᖕᓂᒃ ᐊᒥᕐᓂᒡᓗ ᒥᖁᓕᖕᓂ ᐊᓐᓄᕌᓕᐅᕈᓐᓇᕐᓂᖅ. ᐅᑭᐅᖃᓕᖅᓱᓂ 61-ᓂᒃ, ᐊᔪᖏᓐᓂᕐᒥᓂᒃ ᓴᖑᓕᓚᐅᖅᑐᖅ ᓴᓇᐅᒐᓕᐅᖃᑦᑕᓕᖅᓱᓂ ᓂᕕᖓᓂᐊᖅᑐᓂᒃ ᓴᓇᓯᒪᓪᓗᑎᒃ ᕿᓯᖕᓂᒃ ᐊᑕᔪᓂᒃ ᖃᓗᓈᖅᑕᓄᑦ. ᐊᔾᔨᖑᐊᓕᐊᖏᑦ ᓂᕕᖓᑕᐃᑦ ᐊᔾᔨᖑᐊᖃᓚᐅᖅᑐᑦ ᐃᓅᓯᑐᖃᕐᒥᓂᒃ ᓄᓇᒥᒃ, ᑕᐃᔅᓱᒪᓂ ᖃᓗᓈᓄᑦ ᑎᑭᑕᐅᕋᑖᕐᓂᐊᓕᖅᑎᓪᓗᒋᑦ. ᐃᓚᖏᑦ ᐱᓕᕆᐊᖑᖑᐊᖅᑐᑦ ᐊᔾᔨᓕᐊᖏᓐᓂ ᐊᑐᖅᑕᐅᕙᒍᓃᖅᑐᑦ.

ᑕᓐᓇ ᐊᔾᔨᖑᐊᖅ ᓴᓇᐅᒐᖅ ᐊᑐᖅᑐᐊᖅᑕᐅᓯᒪᔪᖅ ᐹᑕᒃᑯᑦ ᑲᒫᓗᓕᕆᔩᑦ ᑕᑯᔭᒐᖃᕐᕕᖓᓐᓂ 1979-ᒥ. ᑕᑯᒃᓴᐅᔪᑦ ᑲᒻᒥᕙᓪᓕᐅᓂᐅᔪᑦ ᓴᓇᓂᐊᕐᓗᓂ ᐅᖂᓇᕐᓂᐊᖅᑐᓂᒃ ᐸᓂᕐᓇᕐᓂᐊᖅᑐᓂᒃ ᑲᒥᖕᓂᒃ, ᐃᑭᕐᓇᖅᑐᒥ, ᓇᑦᑎᖅᓯᐅᖅᑕᐅᓚᐅᖅᓱᓂ, ᒥᖅᓱᖅᑕᐅᓚᐅᖅᓱᓂ, ᐃᓂᖅᑕᐅᓂᖏᓄᑦ ᑲᒦᑦ. ᐅᓂᒃᑳᕐᓗᑎᑦ ᑖᓐᓇ ᓴᓇᐅᒐᖅ ᐱᒻᒪᕆᐅᓗᖕᒥᒃ ᐅᓂᒃᑲᖅᑐᖅ ᐃᓅᓯᖏᓐᓂ ᐃᓄᐃᑦ. ᐅᓂᒃᑳᕐᓗᑎᑦ ᐊᑐᕐᓗᒍ ᐱᓕᕆᐊᒃᓴᐃᑦ ᐅᓪᓗᒥᒧᑦ ᐊᑐᒐᒃᓴᐃᑦ. ᐊᖏᒡᓕᑎᕐᓗᒋᑦ ᑕᕐᕆᔭᕐᓗᒋᓪᓗᓐᓃᑦ ᑎᑎᕋᕐᕕᒃᓴᖅ 1 –ᐱᓕᕆᐊᒃᓴᐃᑦ ᐅᓪᓗᒥᒧᑦ - ᑭᐅᔾᔪᑏᑦ ᐊᒻᒪᓗ ᑕᒪᕐᒥᒃ ᐃᓕᓐᓂᐊᖅᑐᓕᒫᑦ ᐅᖃᐅᓯᖃᖅᑎᓪᓗᒋᑦ ᓇᓪᓕᐊᒃ ᓯᕗᓪᓕᐊᕙᓪᓕᐊᓯᒪᖕᒪᖔᑕ ᐱᓕᕆᐊᒃᓴᓂ. ᑐᑭᓯᓂᐊᕐᕕᒋᓗᒋᑦ ᑎᑎᕋᕐᕕᒃᓴᖅ 1 –ᐱᓕᕆᐊᒃᓴᐃᑦ ᐅᓪᓗᒥᒧᑦ - ᑭᐅᔾᔪᑏᑦ ᒪᓕᖕᓂᖏ ᑐᑭᓕᐅᕐᓗᒋᑦ ᓴᓇᐅᒐᕐᓂ.

ᐃᓕᑦᑎᓂᖅ:
ᐊᕕᒃᑐᕐᓗᒋᑦ ᐃᓕᓐᓂᐊᖅᑐᑦ ᐱᖓᓲᔪᖅᑐᓄᑦ 6-ᓄᑦ ᐃᓚᒌᒃᓱᖅᑐᓄᑦ. ᑎᓕᓗᒋᑦ ᐊᕕᒃᑐᖅᓯᒪᓂᖓᓂᒃ ᓯᕗᓪᓕᖅᐹᕐᒦᑦᑐᓂᒃ ᑕᑯᔭᒃᓴᓂᒃ ᐊᑐᓂ ᐃᓚᒌᒃᓱᖅᑐᓄᑦ, ᐱᒋᐊᕈᑎᒋᖄᕐᓗᒍ 'ᓄᓇᖓ" ᐊᒻᒪᓗ ᐃᓱᓕᓪᓗᑎᒃ "ᒥᖅᓱᕈᑎᓄᑦ ᓴᓇᕐᕈᑏᑦ". ᐊᐱᕆᓗᒋᑦ ᐅᖃᓕᒫᖁᓗᒋᑦ ᒪᒃᐱᒐᖓᓂᒃ ᓇᐃᓈᕐᓗᒋᓪᓗ ᖃᐅᔨᒪᔭᐅᔪᒃᓴᐃᑦ ᐃᓚᒋᒃᓱᖅᑐᑦ ᐊᕕᒃᑐᖅᑕᐅᓯᒪᓪᓗᑎᒃ 1 – 6 – ᑲᒥᕗᑦ. ᐊᓱᐃᓛᒃ ᐅᓂᒃᑳᕆᓂᐊᖅᑕᖏᑦ ᐃᓕᓐᓂᐊᖃᑎᓕᒫᒥᓄᑦ. ᓇᓗᓇᐃᖅᓯᔪᓐᓇᕆᐊᓖᑦ ᐅᖃᐅᓯᕆᓂᐊᖅᑕᒥᓂᒃ ᑎᓕᔭᐅᓯᒪᔪᓂᒃ ᓇᓪᓕᐊᓃᓐᓂᖏᓐᓂ ᓴᓇᐅᒐᕐᓃᑦᑐᓂ. ᐅᔾᔨᖅᓱᕐᓂᐊᖅᐳᑎᑦ ᓂᐱᖃᕐᓗᑎᒃ ᐅᖃᓕᒫᕆᐊᖃᕐᓂᖏᓐᓂᒃ ᐅᖃᐅᓯᐅᔪᓂᒃ ᐱᒋᐊᓕᓵᕐᓂᖏᓐᓂ ᐱᓕᕆᐊᕆᔭᒥᓂᒃ. ᐅᖃᖅᑕᐅᓯᒪᔪᕕᓃᑦ ᐊᑑᑎᖃᖅᑐᒻᒪᕇᑦ ᐃᓕᓐᓂᐊᖅᑎᓄᑦ ᐃᑲᔫᑕᐅᓂᐊᖅᑐᑦ ᐱᖁᑎᓂᒃ ᐊᑕᓂᖏᓐᓂᒃ ᐃᓄᓪᓚᕆᖕᓄᑦ. ᐅᓂᒃᑲᖅᑕᐅᓂᖏᓐᓂ, ᐊᒥᓱᓕᐊᕆᓗᒋᑦ ᐅᕙᓗᓐᓃᑦ ᑕᕐᕆᔭᐅᖅᑕᐅᓗᑎᒃ ᓴᓇᐅᒐᐃᑦ ᐃᓕᓐᓂᐊᖅᓂᑏᑦ ᐊᑐᕈᓐᓇᕐᓂᐊᕐᒪᒍ.

ᐊᑑᑎᖏᑦ:
ᐊᐱᕆᓗᒋᑦ ᐃᓕᓐᓂᐊᖅᓂᑐᑦ ᑎᑎᖃᖁᓗᒋᑦ ᐅᓂᒃᑳᓕᐊᒥᒃ ᐱᔾᔪᑎᖃᖅᑐᓂᒃ ᓴᓇᐅᒐᕐᒥᒃ ᐃᓱᒪᓂᖓ ᒪᓕᒡᓗᒍ ᐃᓚᒋᔭᐅᖃᑕᐅᔫᑉ. ᓲᕐᓗ ᐆᒃᑑᑎᒋᓗᒍ, ᓂᕈᐊᕈᓐᓇᖅᑐᑦ ᑎᑎᕋᐅᑎᖃᕈᒪᓂᖅ ᓇᑦᑎᖅᓯᐅᖅᑐᓂᒃ ᐃᓱᒪᖓᓂᒃ ᓇᑦᑎᐅᑉ, ᕿᒻᒥᐅᑉ, ᐃᓅᑉ ᐊᖑᑎᐅᑉ, ᐊᖑᓇᓱᒃᑎᐅᓪᓗᓐᓃᑦ. ᐅᕙᓗᓐᓃᑦ, ᑎᑎᕋᕈᓐᓇᖅᑐᑦ ᕿᓯᓕᕆᓂᕐᒥᒃ ᒥᖅᓱᕐᓂᕐᒥᒡᓗ ᑲᒥᖕᓂᒃ ᐊᓈᓇᖓᓂᒃ ᐸᓂᑯᓗᐊᓂᒡᓗᓐᓃᑦ.



ᑎᑭᓴᕐᓕ ᐊᔾᔨᓕᐅᖅᑕᐅᓯᒪᔪᓂᒃ ᑕᐅᒍᑏᑦ Adobe Reader-ᖑᔪᑦ