ᐱᓕᕆᐊᒃᓴᐃᑦ ᓴᓇᔭᒃᓴᐃᓪᓗ

ᓇᑦᑎᖅᓯᐅᓂᕐᒥᒃ ᐊᐃᕙᐅᑕᐅᔪᑦ

ᐳᖅᑐᓂᓖᑦ: ᐳᑐᓂᖅ 10 ᐃᓅᖃᑎᒌᒃᑐᓕᕆᓂᖅ

ᐸᕐᓇᐃᓂᖅ: ᐊᒥᓱᓕᐊᕆᓗᒋᑦ ᐊᔾᔨᖑᐊᑦ ᒋᐊᖃᕈᕕᑦ. ᓴᓇᓗᑎᑦ "ᑲᔪᓯᔪᒥᒃ ᑐᑭᒧᐊᒃᑐᒥᒃ ᑎᑎᖅᓯᓗᑎᑦ'. ᐊᒥᐊᓱᓕᐊᕆᓗᒋᑦ ᐊᐱᖁᑎᒃᓴᐃᑦ ᐃᓱᒪᒃᓴᖅᓯᐅᕈᑕᐅᓂᐊᖅᑐᑦ ᓇᑦᑎᖅᓯᐅᓂᕐᒥᒃ ᐊᒻᒪᓗ ᓇᑦᑎᖅᓯᐅᕐᓂᕐᒧᑦ ᐊᐃᕙᐅᑕᐅᔪᓄᑦ ᐊᐱᖁᑏᑦ

ᑕᑭᓂᖓ: 240 ᒥᓂᑦ (ᓯᑕᒪᐃᖅᑕᖅᓯᒪᓇᔭᖅᑐᑦ ᐱᓕᕆᐊᖑᓂᖏᑦ)

ᐱᖁᑏᑦ: ᑲᓚᓖᑦ ᐸᐃᐹᑦ ᐊᓕᓚᔪᐃᑦ ᑲᔫᓯᓂᐅᓂᐊᖅᑐᒧᑦ ᑐᑭᒧᒃ. ᒥᑭᔫᑏᑦ ᐸᐃᐹᑦ (3" X 3" ᐊᒻᒪᖄ) ᐊᒻᒪᓗ ᐊᑕᑕᐅᑏᑦ ᐸᐃᐹᕐᓄᑦ ᐊᑐᓂ ᐃᓕᓐᓂᐊᖅᑎᓄᑦ.

ᑐᕋᖅᑕᖅ:

  • ᐊᔾᔨᒌᖏᓐᓂᖏᑦ ᑕᑯᓂᐊᕐᓗᒋᑦ ᐅᒃᐱᕆᔭᐅᔪᑦ, ᐱᒻᒪᕆᐅᑎᑕᐅᓂᐅᔪᑦ, ᐊᒻᒪᓗ ᐃᓱᒪᖃᕐᓂᐅᔪᑦ ᑲᓇᑕᒥᐅᓂ ᐃᓄᖁᑎᒋᔭᐅᔪᓂ ᐃᓱᒪᓘᑕᐅᕙᒃᑐᓂᒃ ᐃᓄᓕᒫᓄᑦ ᑐᓴᖅᑕᐅᔪᒪᔪᓂ
  • ᖃᐅᔨᓴᕐᓗᒋᑦ ᒫᓐᓇᐅᔪᖅ ᐃᓄᓕᒫᓄᑦ ᐃᓱᒪᓘᑕᐅᔪᑦ ᐱᔾᔪᑎᖃᖅᑐᑦ ᐊᕿᕋᕇᒃᑐᓂᒃ ᐅᒃᐱᕐᓂᖃᕐᓂᖅ ᐊᒻᒪᓗ ᐱᒻᒪᕆᐅᓂᖃᕐᓂᖅ, ᐅᓂᒃᑳᕐᓗᒋᑦ ᐊᒻᒪᓗ ᖃᐅᔨᓴᕐᓗᒋᑦ ᐊᑭᖃᕇᒃᑐᐃᑦ ᖃᓄᐃᓐᓂᖏᑦ
  • ᓴᕿᑎᑦᑎᓗᑎᒃ ᐊᔪᖏᓐᓂᕐᒥᓂᒃ ᖃᐅᔨᓴᕈᓐᓇᕐᓂᖅ ᐊᐱᖁᑎᓂᒃ ᐃᓄᖃᑎᒋᒃᑐᓄᑦ ᐱᒻᒪᕆᐅᑕᐅᔪᓂᒃ, ᐊᒻᒪᓗ ᐃᓱᒪᖃᕈᓐᓇᕐᓗᑎᒃ ᓈᒻᒪᖏᓐᓂᕆᔪᓐᓇᖅᑕᖏᓐᓂᒃ ᐊᒻᒪᓗ ᐃᓱᒪᒋᔭᐅᒐᔪᖏᑦᑐᓂᒃ ᐃᓱᒪᓇᓱᐊᕐᓗᑎᒃ ᑕᐃᒃᑯᓂᖓ ᐃᓱᒪᓘᑖᐅᔪᓂᒃ
  • ᐅᖃᐅᓯᕆᓗᒋᑦ ᓇᖕᒥᓂᖅ ᐅᒃᐱᕆᔭᖏᑦ, ᐊᑑᑦᑎᐊᕐᓗᑎᒃ ᐅᖃᐅᓯᖃᖅᑎᑦᑎᓇᓱᐊᕐᓂᕐᒥᒃ ᐊᔪᖏᓐᓂᖏᓐᓂᒃ

ᖃᓄᐃᓕᐅᕈᑏᑦ ᐅᓂᒃᑳᖅᑕᐅᓂᖏᑦ:
ᐱᒋᐊᕐᓗᑎᒃ:
ᐅᖃᖃᑎᒋᓗᒋᑦ ᐃᓕᓐᓂᐊᖅᑐᑦ ᓱᓇᓂᒃ ᖃᐅᔨᒪᔭᖃᕐᒪᖔᑕ ᐊᕙᑎᖏᓐᓂᒃ ᐃᓄᐃᑦ ᐃᓕᖅᑯᓯᑐᖃᕐᒥᓂᓗ ᐃᓅᓯᖏᓐᓂᒃ. ᐃᓱᒻᒥᕈᑕᐅᓂᐊᖅᑐᓂᒃ ᓴᓇᓯᒪᓗᑎᑦ ᒪᓕᒐᒃᓴᒥᒃ, ᐃᓕᓐᓂᐊᖅᑎᓄᑦ, ᑎᑎᕋᕐᕕᒡᔪᐊᕐᒥ. ᑕᑯᓗᒋᑦ ᐅᖃᐅᓰᑦ ᑐᑭᖏᓐᓄᑦ ᐃᓱᒪᒧᑦ ᐃᓱᒻᒥᕈᑎᒃᓴᓂᒃ. ᓇᕿᓗᒍ ᐅᓇ ᑕᑯᔪᒪᒍᕕᑦ ᐃᓱᒪᒧᑦ ᐃᓱᒻᒥᕈᑎᒃᓴᒥᒃ. (ᐊᓯᖔᖏᑦ ᑕᐅᑐᒃᑕᐅᔪᓐᓇᖅᑐᑦ ᐋᖀᓱᐃᔾᔪᑏᑦ ᓲᕐᓗ ᐊᓯᕙᐅᑉ ᓴᓇᐅᒐᖑᐊᖓ, ᐃᖃᓘᑉ ᓴᐅᓂᐅᔭᖓ, ᑕᒪᒃᑯᐊᒐᓚᐃᑦ ᐊᑐᖅᑕᐅᖔᕈᓐᓇᕐᒥᔪᑦ, ᒪᓕᒃᓗᒋᑦ ᖃᐅᔨᒪᓂᖏᑦ ᐃᓕᓯᒪᓂᖏᓪᓗ ᓱᕈᓰᑦ).

ᑎᑎᕋᕐᓗᒋᑦ ᑕᕐᕆᔭᕐᓗᒋᓗᓐᓃᑦ ᓴᓇᐅᒐᐃᑦ ᒪᐃᓇ ᓇᐹᖅᑑᑉ. (ᑕᑯᒃᓴᐅᖕᒥᔪᑦᓯᕗᓪᓕᖅᐹᓂ ᐅᖃᐅᓯᕐᓂ ᖃᕆᑕᐅᔭᒃᑯᑦ ᑕᑯᔭᒐᖃᕐᕕᖕᓂ ᑲᒥᕗᑦ: ᐃᓄᐃᑦ ᐊᕐᓇᐃᑦ ᓴᓇᐅᒐᖏᓐᓂ) ᒪᐃᓇ ᓇᐹᖅᑐᖅ ᐃᓅᓚᐅᖅᓯᒪᔪᖅ ᑰᔾᔪᐊᕌᐱᖕᒥ 1913-ᖑᑎᓪᓗᒍ. ᐃᓕᖅᑯᓯᑐᖃᕐᒥᓂᒃ ᐃᓕᓐᓂᐊᖅᓯᒪᔪᖅ, ᐊᔪᖏᑦᑐᒻᒪᕆᒃ ᕿᓯᖕᓂᒃ ᐊᒥᕐᓂᒡᓗ ᒥᖁᓕᖕᓂ ᐊᓐᓄᕌᓕᐅᕈᓐᓇᕐᓂᖅ. ᐅᑭᐅᖃᓕᖅᓱᓂ 61-ᓂᒃ, ᐊᔪᖏᓐᓂᕐᒥᓂᒃ ᓴᖑᓕᓚᐅᖅᑐᖅ ᓴᓇᐅᒐᓕᐅᖃᑦᑕᓕᖅᓱᓂ ᓂᕕᖓᓂᐊᖅᑐᓂᒃ ᓴᓇᓯᒪᓪᓗᑎᒃ ᕿᓯᖕᓂᒃ ᐊᑕᔪᓂᒃ ᖃᓗᓈᖅᑕᓄᑦ. ᐊᔾᔨᖑᐊᓕᐊᖏᑦ ᓂᕕᖓᑕᐃᑦ ᐊᔾᔨᖑᐊᖃᓚᐅᖅᑐᑦ ᐃᓅᓯᑐᖃᕐᒥᓂᒃ ᓄᓇᒥ.

ᑕᓐᓇ ᐊᔾᔨᖑᐊᖅ ᓴᓇᐅᒐᖅ ᐊᑐᖅᑐᐊᖅᑕᐅᓯᒪᔪᖅ ᐹᑕᒃᑯᑦ ᑲᒫᓗᓕᕆᔩᑦ ᑕᑯᔭᒐᖃᕐᕕᖓᓐᓂ 1979-ᒥ. ᑕᑯᒃᓴᐅᔪᑦ ᑲᒻᒥᕙᓪᓕᐅᓂᐅᔪᑦ ᓴᓇᓂᐊᕐᓗᓂ ᐅᖂᓇᕐᓂᐊᖅᑐᓂᒃ ᐸᓂᕐᓇᕐᓂᐊᖅᑐᓂᒃ ᑲᒥᖕᓂᒃ, ᐃᑭᕐᓇᖅᑐᒥ, ᓇᑦᑎᖅᓯᐅᖅᑕᐅᓚᐅᖅᓱᓂ, ᒥᖅᓱᖅᑕᐅᓚᐅᖅᓱᓂ, ᐃᓂᖅᑕᐅᓂᖏᓄᑦ ᑲᒦᑦ. ᐅᓂᒃᑳᕐᓗᑎᑦ ᑖᓐᓇ ᓴᓇᐅᒐᖅ ᐱᒻᒪᕆᐅᓗᖕᒥᒃ ᐅᓂᒃᑲᖅᑐᖅ ᐃᓅᓯᖏᓐᓂ ᐃᓄᐃᑦ. ᐅᓂᒃᑳᕐᓗᑎᑦ ᐊᑐᕐᓗᒍ ᐱᓕᕆᐊᒃᓴᐃᑦ ᐅᓪᓗᒥᒧᑦ ᐊᑐᒐᒃᓴᐃᑦ. ᑐᑭᓯᓂᐊᕐᕕᒋᓗᒋᑦ ᑎᑎᕋᕐᕕᒃᓴᖅ 1 – ᐱᓕᕆᐊᒃᓴᐃᑦ ᐅᓪᓗᒥᒧᑦ - ᑭᐅᔾᔪᑏᑦ ᒪᓕᖕᓂᖏ ᑐᑭᓕᐅᕐᓗᒋᑦ ᓴᓇᐅᒐᕐᓂ. ᐊᒻᒪᓗ, ᑕᑯᒃᓴᐅᑎᑦᑎᓗᑎᑦ ᑕᕐᕆᔭᐅᑎᒃᑯᑦ ᐅᖃᓕᒫᖃᑎᒋᓗᒋᓪᓗ ᐃᓕᓐᓂᐊᖅᑐᑦ ᓄᓇᒥᒃ, ᕿᓯᖕᓂᒃ/ᐊᒥᕐᓂᒃ ᐊᓐᓄᕌᓂᒃ ᐊᒻᒪᓗ ᕿᓯᖕᓂᒃ/ᐊᒥᕐᓂᒃ ᑲᒦᑦ ᐃᓗᐊᓃᑦᑐᑦ ᑕᑯᔭᒐᐃᑦ ᐃᓕᓐᓂᐊᖅᑐᑦ ᑐᑭᓯᕚᓪᓕᕐᓂᐊᕐᒪᑕ ᖃᓄᐃᑦᑑᓂᖓᓂᒃ ᐅᑭᐅᖅᑕᖅᑐᒥ ᓯᓚ ᐊᒻᒪᓗ ᖃᓄᐃᑦᑑᓂᖏᓐᓂ ᐱᖁᓯᑐᖃᖏᓐᓂ ᐃᓄᐃᑦ ᐊᓐᓄᕌᖏᑦ.

ᐅᓂᒃᑳᕐᕕᒋᓗᒋᑦ ᓱᕈᓰᑦ ᐃᓚᐅᓂᐊᕐᓂᖏᓐᓂᒃ ᐊᐃᕙᐅᑕᐅᓂᐊᖅᑐᓂᒃ ᓇᑦᑎᖅᓯᐅᕐᓂᕐᒥᒃ ᐱᔾᔪᑎᖃᖅᑐᓂᒃ. ᐅᓂᒃᑳᕐᓗᑎᑦ ᐊᐃᕙᓂᐅᓂᐊᖅᑐᖅ ᐱᒻᒪᕆᐅᓗᓂ ᐅᖃᐅᓯᖃᕐᓂᐅᓂᐊᖅᑐᖅ ᒪᕐᕉᖕᓂᒃ ᐊᕕᒃᓯᒪᔫᖕᓂᒃ ᐃᓚᒌᒃᓱᖅᑐᓂᒃ, ᐊᑭᕋᕇᖕᓂᒃ ᐃᓱᒪᖃᖅᑐᓂᒃ ᐃᓱᒪᓘᑕᐅᔪᒥᒃ. ᑕᒡᕙᓂ ᐊᐃᕙᓂᕐᒥ, ᐃᓕᓐᓂᐊᖅᓂᑏᑦ ᐊᐃᕙᐅᑎᖃᕐᓂᐊᖅᑐᑦ ᐊᑭᕋᖅᑐᕐᓗᒍ ᓇᑦᑎᖅᓯᐅᕐᓂᖅ ᐊᒻᒪᓗ ᑲᔪᓯᕈᔨᓂᖅ ᓇᑦᑎᖅᓯᐅᓂᕐᒥᒃ. ᐅᓂᒃᑳᒃᑲᓐᓂᕈᒪᑐᐃᓐᓇᕆᐊᖃᖅᑕᑎᑦ ᖃᓄᖅ ᐊᐃᕙᐅᑎᖃᕐᓂᖏᓐᓂ ᓴᖏᓂᖃᕈᑎᒋᓂᐊᕐᒪᖔᒋᑦ, ᐊᒻᒪᓗ ᐱᕕᒃᓴᖃᖅᑎᑦᑐᓐᓇᖅᓱᒋᑦ ᓱᕈᓰᑦ ᐊᐃᕙᐅᑎᖃᕈᓐᓇᕐᓂᕐᒥᒃ ᐃᓕᓐᓂᐊᕐᓂᖅ, ᐱᖁᓯᖃᖃᑦᑕᕐᓂᖏᓐᓂᓗ, ᑲᔪᓯᒋᐊᓚᐅᖅᑎᓐᓇᒋᑦ ᐊᐃᕙᐅᑎᖃᕐᓂᕐᒥᒃ ᓇᑦᑎᖅᓯᐅᕐᓂᕐᒥᒃ.

ᐆᒃᑐᕋᕈᒪᓪᓗᒋᑦ ᐊᐅᕙᐅᑕᐅᔪᑦ ᐊᓯᔾᔨᖅᓯᔾᔪᑕᐅᓂᐊᕐᒪᖔᑕ ᐃᓱᒪᖏᓐᓂᒃ ᓱᕈᓰᑦ ᒫᓐᓇᐅᔪᖅ ᖃᓄᐃᓕᖓᓂᖏᓐᓂᒃ ᓇᑦᑎᖅᓯᐅᕐᓂᐅᑉ ᒥᒃᓵᓄᑦ, ᑎᑎᕋᕐᓗᑎᑦ ᑐᑭᒧᐊᒃᑐᒥᒃ ᑲᓚᖃᖅᑐᒥ ᐸᐃᐹᕐᒥ, ᓂᕕᖓᕐᓗᒍᓗ ᓴᓂᕋᒧᑦ, ᐃᒡᓗᕈᓯᔅᓯᓐᓂ. ᓇᓗᓇᐃᕐᓗᒋᑦ ᐊᑕᐅᓯᕐᒦᑦᑐᑦ ᐃᓱᐊᓂ ᐃᒫᒃ "ᓴᖏᔪᒻᒪᕆᖕᒥᒃ ᐊᖏᕈᑎᒋᔮ" ᐊᒻᒪᓗ ᐃᒡᓗᐊᒍᑦ ᐃᓱᐊᓂ ᑎᑎᕋᕐᓗᒍ "ᓴᖏᔪᒻᒪᕆᖕᒥᒃ ᐊᖏᕈᑎᒋᖏᑖ". ᑐᓂᐅᖃᕐᓗᒋᑦ ᒥᑭᔫᑏᑦ ᐸᐃᐹᑦ ᐊᓕᓚᔪᐃᑦ ᐊᒻᒪᓗ ᑕᐃᒃᑯᐊ ᐊᑕᑕᕈᑏᑦ ᐸᐃᐹᕐᓄᑦ ᐊᑐᓂ ᐃᓕᓐᓂᐊᖅᑎᓄᑦ. ᐊᐱᕆᓗᒋᑦ ᑎᑎᕋᖁᓗᒋᑦ ᐊᑎᕐᒥᓂᒃ ᐸᐃᐹᕐᒧᑦ ᐊᑦᑕᑕᕐᓗᒋᓪᓗ ᑐᑭᒧᐊᒃᑐᒧᑦ ᖃᓂᓐᓂᖅᐹᕇᔫᒥᓇᖅᑕᖓᓄᑦ ᐃᓱᒪᒋᔭᖓᓄᑦ, ᐱᔾᔪᑎᖃᖅᑐᓂᒃ ᓇᑦᑎᖅᓯᐅᕐᓂᕐᒥᒃ. ᐱᕕᒃᓴᖃᕐᓂᐊᖅᑐᑦ ᓅᑦᑎᔪᓐᓇᕐᓂᖅ ᓇᓗᓇᐃᒃᑯᑕᕆᔭᒥᓂᒃ ᐃᓱᒪᖏᔭᖏᑦ ᐊᓯᔾᔨᖅᓯᒪᒍᑎᒃ ᐊᐃᕙᐅᑕᐅᓚᐅᖅᑎᓪᓗᒋᑦ. ᑐᑭᓯᓂᕋᕐᓂᐊᖅᐳᑎᑦ ᐊᐃᕙᐅᑎᖃᑐᐃᓐᓇᕆᐊᖃᕐᓂᖏᓐᓂᒃ ᐅᒃᐱᕆᔭᖏᓐᓂᒃ ᐊᑭᕋᖅᑐᖅᑐᓂᒃ, ᐊᒻᒪᓗ ᐅᖃᐅᑎᑦᑎᐊᕐᓗᒋᑦ ᐱᐅᔫᓂᖓᓂᒃ ᑕᐃᒪᐃᓕᐅᕈᓐᓇᕐᓂᖅ ᐊᔪᖏᓐᓂᖅᑖᕆᓇᓱᐊᕐᓗᒍ ᑕᐃᒪᐃᓕᖓᔪᓐᓇᕐᓂᖅ.

ᖃᐅᔨᒪᔭᐅᓂᐊᖅᐳᖅ: ᐃᒃᐱᒍᓱᑦᑎᐊᕐᓂᐊᖅᐳᑎᑦ ᑕᒪᓐᓇ ᐃᓱᒪᓘᑕᐅᔪᖅ ᓇᑦᑎᖅᓯᐅᕐᓂᕐᒥᒃ ᐊᒃᓱᕉᑕᐅᖃᑦᑕᕐᒪᑦ, ᐊᒻᒪᓗ ᐊᔾᔨᖑᐊᑦ ᓇᑦᑎᖅᓯᐅᕐᓂᓕᕆᔪᑦ ᐃᓱᒪᓘᑕᐅᓕᑐᐃᓐᓇᕆᐊᖃᕐᓂᖏᓐᓄᑦ ᐃᓕᓐᓂᐊᖅᑎᐅᔪᓄᑦ.

ᐃᓕᑦᑎᓂᖅ:
ᓇᓗᓇᐃᕐᓗᒋᑦ ᐋᖀᐅᒪᓂᐅᓂᐊᖅᑐᑦ ᐊᐃᕙᐅᑕᐅᓂᐊᖅᑐᓂ (ᐊᑖᓃᑦᑐᑦ ᑕᑯᓗᒋᑦ). ᐊᕕᒃᑐᕐᓗᒋᑦ ᐃᓕᓐᐊᖅᑐᑦ ᒪᕐᕉᖕᓄᑦ ᐃᓚᒌᒃᓱᕐᓂᐊᖅᑐᓄᑦ. ᐊᑐᓂ ᐃᓚᒌᒃᓱᖅᑐᑦ ᐃᓚᐅᔭᕆᐊᖃᖅᐳᑦ ᑐᑭᓯᓂᐊᖅᑕᐅᖄᕆᐊᖃᖅᑐᓂ, ᐊᒻᒪᓗ ᐅᖃᐅᓯᕆᓂᐊᖅᑕᖏᓐᓂ ᖃᓄᐃᓕᐅᕐᓂᐊᕐᒪᖔᑕ. ᐊᑐᓂ ᐃᓚᒌᒃᓱᖅᑐᑦ ᑎᒃᑯᐊᖅᓯᔭᕆᐊᓖᑦ:

  • ᓯᕗᓕᐅᖅᑎᒃᓴᒥᒃ ᒪᑐᐃᖅᓯᓂᕐᒧᑦ ᐊᐃᕙᐅᑎᓂᒃ ᐅᓂᒃᑳᕐᓂᐊᖅᑐᖅ
  • ᐱᖓᓱᓂᒃ ᐊᐱᖅᓱᖅᑎᓂᒃ, ᐊᐱᕆᖃᑦᑕᕐᓂᐊᖅᑐᓂᒃ ᐊᑐᓂ ᐊᑭᕋᒥᓄᑦ ᐊᑕᐅᓯᕐᒥᒃ ᐊᐱᖁᑎᒥᒃ
  • ᑕᓪᓕᒪᓂᒃ ᐊᐱᖁᑎᓄᑦ ᑭᐅᔨᓂᒃ, ᐊᑐᓂ ᐊᑕᐅᓰᕐᓗᑎᒃ ᑭᐅᓂᐊᖅᑐᓂᒃ ᐊᑭᕋᖓᑕ ᐊᐱᖁᑎᖏᓐᓂᒃ, ᐊᒻᒪᓗ ᐊᐃᕙᑎᑦᑎᔫᑉ ᐊᐱᖅᑯᑎᖏᓐᓂᒃ
  • ᐊᑕᐅᓯᕐᒥᒃ ᐊᒥᓲᓂᖅᓴᓂᒡᓗᓐᓃᑦ ᑭᐅᒪᒋᐊᒃᑲᓐᓂᖅᑎᐅᓂᐊᖅᑐᓂᒃ ᑭᐅᒪᓂᐊᖅᑐᓂᒃ ᐊᑭᕋᖓᑕ ᑭᐅᔾᔪᑎᒋᔭᖏᓐᓄᑦ
  • ᒪᑐᓯᔨᒥᒃ, ᒪᑐᓯᓂᕐᒧᑦ ᐅᖃᖅᑎᐅᓂᐊᖅᑐᖅ ᐊᐃᕙᓂᕐᒥᒃ.
(ᖃᐅᔨᒪᔭᐅᓂᐊᖅᐳᖅ : ᐃᓕᓴᐃᔨ ᐊᑯᑦᑎᔪᓐᓇᖅᑐᖅ ᖃᓄᑐᐃᓐᓇᖅ ᑖᒃᑯᐊ ᖃᓄᐃᓕᐅᖅᑎᐅᓂᖏᓐᓂᒃ ᐅᕙᓗᓐᓃᑦ ᐋᕿᒃᓱᕐᓗᓂᒋᑦ ᐊᑐᓂ ᐃᓕᓐᓂᐊᖅᑐᑦ ᐱᕕᒃᓴᖃᕐᓂᖅᓴᐅᓂᐊᕐᒪᑕ ᐃᓚᐅᔪᓐᓇᕐᓂᖅ ᐊᐃᕙᑕᐅᔪᓂ).

ᐃᓕᓴᐃᔨ ᓂᕈᐊᕆᐊᖃᕐᒥᔪᖅ ᐊᑕᐅᓯᕐᒥᒃ ᐃᓕᓐᓂᐊᖅᑎᒥᒃ ᐊᐃᕙᑎᑦᑎᔨᐅᓂᐊᖅᑐᒥᒃ. ᑖᓐᓇ ᐃᓄᒃ ᖃᐅᔨᓴᖅᓯᒪᔭᕆᐊᖃᖅᑐᖅ ᖃᓄᐃᓕᐅᖅᑎᐅᔭᕆᐊᖃᕐᒪᖔᑦ ᐊᐅᕙᑎᑦᑎᔪᖅ ᐊᒻᒪᓗ ᐊᐱᖁᑎᒃᓴᓂᒃ ᐋᕿᒃᓱᐃᓯᒪᕙᒌᕐᓗᓂ ᐊᐱᕆᓂᐊᖅᑕᖏᓐᓂᒃ ᐊᑐᓂ ᐊᑭᕋᕆᑦ. ᖃᐅᔨᓴᑦᑎᐊᕐᓂᐊᕐᐳᑎᑦ ᐃᓕᓐᓂᐊᖅᑏᑦ ᑐᑭᓯᐅᒪᑦᑎᐊᕐᒪᖔᑕ ᓂᕆᐅᒋᔭᕐᓂᒃ ᖃᓄᐃᓕᐅᖁᖕᒪᖔᖅᐱᒋᑦ ᐊᑐᓂ ᐃᓚᒌᖅᓱᖅᑐᓂ ᐃᓚᒋᔭᐅᔪᑦ.

ᐃᓕᓐᓂᐊᖅᑏᑦ ᒪᕐᕉᖕᓂ ᐃᓕᓐᓂᐊᕐᓂᖃᕐᓂᐊᖅᑐᑦ ᐊᕕᒃᑐᖅᑕᐅᓯᒪᓂᐊᕐᒪᑕ ᖃᐅᔨᓴᖅᑕᐅᔭᕆᐊᓖᑦ ᓱᓇᐅᓂᖏᑦ, ᐅᖃᐅᓯᕆᓗᓂᒋᓪᓗ ᖃᓄᐃᓕᐅᕐᓂᐊᕐᓂᖏᑦ, ᑎᑎᕋᕐᓗᑎᒃ ᐊᐱᖁᑎᒋᑐᐃᓐᓇᕆᐊᖃᖅᑕᖏᓐᓂᒃ ᐊᑭᕋᒥᓄᑦ ᐃᓚᒌᒃᑐᓄᑦ, ᐃᓱᒪᒃᓴᖅᓯᐅᕈᑎᖃᕐᓗᑎᒃ ᑭᐅᔾᔪᑎᒋᓂᐊᖅᑕᖏᓐᓂᒃ. ᑐᓂᐅᖃᕐᓗᒋᑦ ᐊᐱᖁᑎᒃᓴᐃᑦ ᐃᓱᒪᒃᓴᖅᓯᐅᕈᑕᐅᓂᐊᖅᑐᑦ ᓇᑦᑎᖅᓯᐅᕐᓂᕐᒥᒃ ᐃᑲᔫᑕᐅᓗᑎᒃ ᐃᓕᓐᓂᐊᖅᑎᓄᑦ ᖃᐅᔨᒋᐊᕆᐊᖃᖅᑕᖏᓐᓂᒃ ᖃᐅᔨᒋᐊᕐᓂᖅ.

ᖃᐅᔨᒪᔭᐅᓂᐊᖅᐳᖅ: ᐃᓕᓴᐃᔨ ᕿᒥᕐᕈᐊᖅᐸᒌᕆᐊᖃᖅᑐᖅ ᖃᕆᑕᐅᔭᒃᑯᑦ ᐅᐸᒃᑕᕐᕕᖕᓂ ᐃᓱᒪᒋᔭᐅᔪᓂ ᐊᐱᖁᑎᒃᓴᐃᑦ ᐃᓱᒪᒃᓴᖅᓯᐅᕈᑏᑦ ᓇᑦᑎᖅᓯᐅᓂᕐᒥᒃ ᑕᐃᒫᒃ ᖃᐅᔨᒪᓂᐊᕐᒪᒋᑦ ᓱᓕ ᐅᐸᒃᑕᐅᔪᓐᓇᕐᓂᖏᑦ ᐊᒻᒪᓗ ᐊᑑᑎᖃᕐᓂᖏᑦ. ᐃᓕᓐᐊᓂᕐᕕᖕᓂ ᐊᑐᐊᒐᕆᔭᐅᔪᑦ ᒪᓕᒃᑕᐅᔭᕆᐊᓖᑦ ᐃᓕᓐᓂᐊᖅᑎᓄᑦ ᐊᑐᕐᓂᖏᓐᓂ ᖃᕆᑕᐅᔭᓂᒃ ᑐᑭᓯᓂᐊᕐᕕᖕᓂᒃ.

ᐊᑑᑎᖏᑦ:
ᐊᐃᕙᐅᑏᑦ ᐊᑐᖅᑕᐅᓂᐊᖅᑐᑦ ᑭᖑᓪᓕᖅᐹᕐᒥ ᐃᓕᓐᓂᐊᕐᓂᖏᓐᓂ. ᐃᓕᓴᐃᔨ ᓇᓗᓇᐃᖅᓯᓯᒪᔭᕆᐊᖃᖅᑐᖅ ᑕᐃᒃᑯᐊ ᐃᓱᒪᓘᑕᐅᔪᑦ ᐊᒻᒪᓗ ᐃᓱᒪᓂᕆᔭᐅᔪᑦ ᒫᓐᓇᐅᔪᖅ ᐊᑭᕋᖅᑑᑕᐅᔪᒻᒪᕆᐊᓘᒐᓗᐊᖅᑎᓪᓗᒋᑦ, ᐊᐃᕙᐅᑎᔪᑦ ᐃᖕᒥᓂᒃ ᓇᖕᒥᓂᖅ ᖃᓄᐃᓐᓂᖏᑦ ᑐᖓᓇᕋᓱᐊᕆᐊᖃᖅᐳᑦ ᐃᓕᕋᓇᖅᓵᖏᓗᑎᒃ ᖃᖓᓕᒫᖅ. ᐊᐃᕙᑎᑦᑎᔨᐅᔪᖅ, ᐃᑲᔪᖅᑎᖃᕐᓗᓂ ᐃᓕᓴᐃᔨᒥᒃ, ᓄᖃᖅᑎᑦᑎᑲᐅᑎᒋᔪᓐᓇᖅᑐᖅ ᐱᔭᕇᖏᑦᑑᒐᓗᐊᒥᒃ ᐃᒃᐱᒍᓱᑦᑎᐊᖏᑐᐊᖅᐸᑦ ᓈᒪᖏᑦᑐᒥᒡᓗᓐᓃᑦ ᐊᑐᓕᕆᐊᖅᑐᖃᖅᐸᑦ.

ᐃᓕᓴᐃᔩᑦ ᐊᑐᕈᓐᓇᖅᑐᖅ ᓇᓗᓇᐃᒃᑯᑕᕐᓂᒃ ᐱᕚᓪᓕᕈᑕᐅᔪᓂᒃ ᖃᐅᔨᓴᕐᕈᑎᒋᓗᒋᑦ ᐃᓕᓐᓂᐊᖅᑎᐅᑉ ᐱᔭᕇᖅᑕᖏᓐᓂᒃ. ᓂᑭᑦᑖᕐᓗᒋᑦ ᑎᑎᕋᖅᓯᒪᔪᑦ ᐃᓚᒋᓗᒋᑦ ᐃᓕᓐᓂᐊᖅᓂᑏᑦ, ᐊᐃᕙᐅᑎᓂᕐᒥᒃ ᐱᒋᐊᓚᐅᖏᓐᓂᖏᓐᓂ.

  • ᐋᖀᐅᒪᔭᐅᓗᑎᒃ ᐊᒻᒪᓗ ᑐᑭᖃᑦᑎᐊᕐᓗᑎᒃ ᐊᐃᕙᐅᑏᑦ
  • ᐊᐃᕙᐅᑕᐅᔪᑦ ᐃᑲᔪᖅᓲᖅᑕᐅᔾᔪᑎᖃᕐᒪᖔᑕ ᓱᓕᓂᐅᔪᓄᑦ ᐊᒻᒪᓗ ᐆᒃᑑᑎᓕᐊᓄᑦ
  • ᐊᑑᑎᖃᑦᑎᐊᕐᓂᖏᑦ ᑭᐅᔾᔪᑏᑦ
  • ᓴᖑᑦᑎᔪᓐᓇᖅᑎᒋᓂᖏᑦ ᐊᐃᕙᐅᑕᐅᔪᑦ
  • ᐱᓕᕆᖃᑎᖃᑦᑎᐊᕈᓐᓇᕐᓂᖅ ᐃᓚᒥᓂᒃ

ᐃᓱᒪᒋᔭᐅᔪᑦ ᐊᐃᕙᐅᑕᐅᔪᓂ ᐊᖀᐅᒪᓂᕆᔭᐅᓇᔭᖅᑐᑦ:
ᓴᕿᑎᑕᐅᓂᖏᑦ ᐃᓱᒪᒋᔭᐅᔪᑦ

  • ᐊᑐᓂ ᐊᑭᕋᕇᒃ 5 ᒥᓂᑦᖃᕐᓂᐊᖅᐳᑦ, ᐱᕕᒃᓴᖏᑦ ᓈᓴᖅᑕᐅᓗᑎᒃ ᐊᐃᕙᑎᑦᑎᔨᒧᑦ, ᐅᖃᕈᓐᓇᕐᕕᒋᓗᓂᒋᑦ ᐃᓱᒪᒋᔭᖏᓐᓂᒃ ᐅᖃᐅᓯᐅᔪᓂᒃ.
ᐊᐱᖅᓱᕐᓇᖅ
  • ᐊᑐᓂ ᐊᑭᕋᕇᑦ ᐊᐱᕈᓐᓇᖅᑐᑦ ᐱᖓᓱᓂᒃ ᐊᐱᖁᑎᓂᒃ ᐊᑭᕋᒥᓄᑦ.
  • ᐊᐃᕙᑎᑦᑎᔪᖅ ᐊᐱᕆᔪᓐᓇᕐᓂᐊᓕᖅᐳᖅ ᒪᕐᕉᖕᒥᒃ ᐊᐱᖁᑏᖕᓂᒃ ᐃᒡᓗᒃᑐᑦ ᐊᑭᕋᕇᖕᓄᑦ.
ᑭᐅᒃᑲᓐᓂᕈᑏᑦ
  • ᐊᑐᓂ ᐃᓚᒌᒃᓱᖅᑐᑦ ᐊᑭᕋᕇᒃ ᐱᕕᒃᓴᖃᕐᓂᐊᖅᑐᑦ ᐅᖃᐅᓯᖃᕈᓐᓇᕐᓂᖅ ᐊᑭᕋᖓᑕ ᑭᐅᔾᔪᑎᒋᖃᐅᔭᖏᓐᓂᒃ ᐊᐱᖁᑎᒥᓄᑦ. ᐊᑐᓂ ᐃᒡᓗᒌᒃ ᐊᑭᕋᕇᒃ 5 ᒥᓂᑦᖃᕐᓂᐊᖅᑐᑦ ᑭᐅᒃᑲᓐᓂᕈᓐᓇᕐᓂᖅ.
ᒪᑐᓯᓂᕐᒧᑦ ᐊᐃᕙᐅᑏᑦ
  • ᑕᒪᕐᒥᒃ ᐊᑐᓂ ᐃᒡᓗᒌᒃ ᐊᑭᕋᕇᒃ 5 ᒥᓂᑦ ᐅᖃᕈᓐᓇᖅᑐᑦ ᒪᑐᓯᓂᕐᒥᓄᑦ.

ᐊᐃᕚᓂᒃᑯᑎᒃ, ᐊᐱᕆᓗᒋᑦ ᐃᓕᓐᓂᐊᖅᑐᑦ ᐃᓱᒪᒃᓴᖅᓯᐅᕈᑎᖃᖁᓪᓗᒋᑦ ᐅᖃᐅᓯᕆᓗᒋᓪᓗ ᐊᔾᔨᒌᖏᑦᑐᓂᒃ ᐊᐃᕙᐅᑕᐅᖃᐅᔪᓂ, ᐊᒻᒪᓗ ᑕᑕᑎᕐᓗᒋᑦ ᓇᑦᑎᖅᓯᐅᕐᓂᕐᒧᑦ ᐊᐃᕙᐅᑕᐅᔪᓂ ᐊᐱᖁᑏᑦ. ᓂᕈᐊᕐᓂᖏᑦ ᐃᓚᒌᒃᓱᖅᑐᑦ ᓵᓚᒃᓴᖅᑐᑦ ᐊᐃᕙᑕᐅᔪᒥᒃ ᐊᑐᖅᑕᐅᔪᓐᓇᕐᒥᔪᖅ. ᑭᖑᓪᓕᖅᐹᒥ, ᐃᓕᓐᓂᐊᖅᑏᑦ ᐱᕕᒃᓴᖃᖅᑎᓐᓂᐊᖅᐸᑎᑦ ᐊᓯᔾᔨᖅᕈᓐᓇᕐᓂᖅ ᖃᓄᐃᓕᖓᓂᕆᖃᐅᔭᒥᓂᒃ ᓇᓗᓇᐃᒃᑯᑕᕐᒥᒃ ᑲᔪᓯᔪᒥᒃ ᑐᑭᒧᐊᒃᑐᒥ ᑎᑎᕋᖅᑕᐅᓯᒪᔪᒥ, ᐃᓱᒪᒋᔭᖏᑦ ᐊᓯᔾᔨᖅᑐᕕᓂᐅᒍᑎᒃ.

ᖃᐅᔨᓴᖅᑕᐅᔭᕆᐊᓕᖕᓂ ᐱᓕᕆᐊᒃᓴᐃᑦ
ᐊᐱᕆᓗᒋᑦ ᐃᓕᓐᓂᐊᖅᑐᑦ ᖃᐅᔨᓴᖁᓗᒋᑦ ᐊᔾᔨᒌᖏᑕᖏᓐᓂᒃ ᐅᓪᓗᒥᐅᓕᖅᑐᖅ ᐃᓱᒪᓘᑕᐅᔪᓂᒃ ᐊᒃᑐᐊᓂᖃᖅᑐᓂᒃ ᐃᓄᖕᓂᒃ ᓲᕐᓗ ᓯᓚᐅᑉ ᐆᓇᖅᓯᕙᓪᓕᐊᓂᖓᓂᒃ, ᐊᒥᐊᒃᑯᖃᐃᓐᓇᕐᓗᓂ ᐱᕙᓪᓕᐊᔪᓕᕆᓂᖅ, ᐅᖃᐅᓰᑦ ᓴᐳᓐᓂᐊᖅᑕᐅᓂᖏᑦ, ᑕᒪᒃᑯᐊᒐᓚᐃᑦ.



ᑎᑭᓴᕐᓕ ᐊᔾᔨᓕᐅᖅᑕᐅᓯᒪᔪᓂᒃ ᑕᐅᒍᑏᑦ Adobe Reader-ᖑᔪᑦ